حكاية 3 وردات

حكاية 3 وردات

رسول سلام وحب
ورسالته دى من القلب

تحكى كلام كتير
فى سجون قلبي أسير

تحكى همسات بريئة
عن حلم يكون حقيقة

وتشوفى بريق عيونى
وتحسى بحب جنونى

لو تحكى ورقة ورقة
حنين وعذوبة ورقة

ما تكفى وردة واحدة
طيب خدى التانية
التانية بداية حب
حب إتولد خلاص

كانت الوردة شاهدة
لحظة ميلاد إحساس

إحساس رقيق وغريب
معقول .. بقالى حبيب !!

إحكى لى يا وردة تانى
يا رسول أجمل معانى

إحكى لى عن القلوب
و إزاى كيوبيد لقانى

أقولك .. بلاش تحكى
أنا دلوقتى اللى هحكى

هحكيلك أنا بنفسي
إسمعى لسكوتى وهمسى

فى غدى ويومى و أمسى
إشهدى بس اوعى تنسى

أنا عاوزاكى شاهدة
دى الوردة التالتة جاية ..



الوردة التالتة عهد
نفضل على طول سوا

أبداً ما نفارق بعض
زى ما جمعنا الهوا

الوردة منى ليكى
ضميها أوى باديكي

هتحسى حبى وفرحى
حنانى وخوفى عليكى

الوردة منى ليك
احضنها أوى بعنيك

هتلاقى الوردة تبكى
يمكن عشان مش هتحكى

أصل الورود رسول
وخلاص أدى الرسالة

كل الورود بتقول
عيشيها دى أحلى حالة

وبقت ورودنا ذكرى
نحكيها إحنا بكرة

*_* حكاية لـ 3 وردات *_*